ننام فـ صمت !
ليلنا واحد،
والجفا ما بيننا يرسم دروب
ننام فـ صمت،
وانتلحف بالشقا، صمت الذنوب
كل واحد يشكي همه للأرق..
كلنا شايل جروحه،
وش فرق !
غير إني كنت أحبك،
واكتفيت.
من همومك..
والشقا منه انتهيت.
كنت أحبك،
للأسف.. مات الشعور.
صرت مثلك،
كل احساسي، فتور.
كنت أشوفك غير أدري..
وصرت أشوفك غير.. تدري ؟
وصارت اللحظة مسافة،
بين قلبك، وبين قلبي.
!
الوسادة اللي يمي خالية
نايم احساسك عليها !
أقرا صمتك،
وأختم أحزاني.. وأبكي.
أرسم جروحي على ظهر المسافة
وافتقد كل الدفا اللي فـ عيونك
واحضنك،
ما ألقى صدرك !
الجفا بعثر ولهنا،
واحنا يم بعض، افترقنا !
والوسادة اللي يمي خالية
ميت احساسك عليها
كنت أحسك غير أدري
وصرت أحسك غير.. تدري ؟
وصارت اللحظة مسافة،
بين قلبك، وبين قلبي.
!
قلبك القاسي شتا،
وأنا أحتاج الدفا.
برد ينفض كل شعوري
واتناثر، قطعة قطعة..
وما تلمني !
أرتعش..
حزني تكسر فوق صمتك
والجليد اللي سكن صدرك،
سكني !
ما أعرفك مثل الأول
حتى أنا ما اعرفني !
والسؤال اللي جرح نبض الإجابة..
انت مازلت تعرفني ؟
كنت أعرفك غير أدري
وصرت أعرفك غير.. تدري ؟
وصارت اللحظة مسافة،
بين قلبك، وبين قلبي.
!
يمي انت، ومنت يمي !
همك أصغر من وجودي
وأنا قربك كل همي.
تسرق الفرحة من عيوني، وتنام.
والحزن يرخي على صدري لثام.
ودي مثل أول أحبك،
أو مثل أول تحبني.
أدري ضعنا،
والدروب اللي اجـمعتنا يوم
بالحب، اخدعتنا.
وضعت انت وضعت أنا،
وضاع حبنا.
وخاب ظن الحب فينا،
وخاب في هـ الحب ظنـا
كنت أظنك غير أدري
وصرت أظنك غير.. تدري ؟
وصارت اللحظة مسافة،
بين قلبك، وبين قلبي.
موضوع: ننام في صمت !! 
الثلاثاء أبريل 22, 2008 9:11 am
